Avtoritet Rövşən Lənkəranskiyə hökm oxundu

“Qanuni oğru” Ded Xasanın (Aslan Usoyan) tərəfdarları liderlərinin qətli ilə bağlı apardıqları araşdırmaya yekun vurublar.

Müqəssir azərbaycanlı avtoritet Rövşən Lənkəranski (Canıyev) müəyyən edilib.

Gün.Az “Rosbalt”a istinadən xəbər verir ki, ona və onun klanının üzvlərinə “hökm” oxunub.

Rəqiblərin aradan qaldırılması prosesinə artıq start verilib. Moskvada Rövşənin “sağ əli” olan Rufo Gəncanski ləqəbli “qanuni oğru” Rüfət Nəsibov qətlə yetirilib. Ded Xasan tərəfdarlarının hökmünə görə, Rövşənin klanı özü də başda olmaqla məhv ediləcək.

Hüquq-mühafizə orqanlarındakı mənbənin “Rosbalt”a bildirildiyinə görə, yanvarın 16-da Aslan Usoyan snayperlə vurulan zaman Rüfət Nəsibov Ukraynada olub. Ded Xasan ölən kimi Gəncanski Moskvaya gəlib, lakin burada olduğunu gizlətməyə çalışıb. Onun paytaxtda olduğunu çox az adam bilsə də, məlumat Ded Xasan tərəfdarlarının qulağına çatıb.

Yanvarın 28-i gecə saatlarında Nəsibovun yaşadığı yerə killerlər gəlib. “Qanuni oğru”nu görən kimi ona atəş açmağa başlayıblar, cəsədini baqaja qoyaraq naməlum istiqamətdə aparıblar. Ded Xasanın klanından məhz kimin bu cinayəti törətdiyi hələ ki, məlum deyil. Lakin qurbanı hadisə yerindən aparmaq dəst-xətti Lotu Qulu ləqəbi ilə tanınan avtoritet Nadir Səlifova məxsusdur.