Azərbaycanın əməkdar artisti mükafat aldı

Akademik Milli Dram Teatrının aparıcı aktrisası, əməkdar artist Mətanət Atakişiyeva “Humay” milli mükafatına layiq görülüb. Aktrisa sevinc hisslərini oxucularımız ilə bölüşüb:

“ “Humay” mükafatını mənə çalışdığım Akademik Milli Dram Teatrında “Şekspir”, “Xanuma” və “Gəncə qapıları” tamaşalarındakı uğurlu rollarıma görə təqdim ediblər. Bu il mənim üçün çox düşərli il oldu. Adətən insanlar 13 rəqəmini sevmirlər, amma 12 və 13 mənim ən çox sevdiyim rəqəmlərdir. Xoşbəxtlikdən ad günüm də may ayına təsadüf edir (gülür). Mənim teatrdakı zəhmətimi dəyərləndirdiklərinə görə “Humay” Milli Akademiyasının hər bir üzvünə dərin minnətdarlığımı bildirirəm. Mənimlə birlikdə sevinən dostlarıma isə ürəkdən təşəkkür edirəm. Bütün sənət yoldaşlarıma uğurlar və sənət yenilikləri arzu edirəm” deyə aktrisa bildirib.

Qeyd edək ki, aktrisanın teatrda son yeni rolu “Qaraca qız” tamaşasında Pəricahan xanım obrazıdır.