Fatih Terim: “Məğlubiyyət bizi təəccübləndirməyəcək, lakin qalib gəlsək, deməli, belə də olmalıdır”

“Qalatasaray”ın baş məşqçisi Fatih Terim Çempionlar Liqasının ¼ final mərhələsinin ilk oyunu ərəfəsində açıqlama verib. Musavat.com-un UEFA-nın saytına istinadən verdiyi məlumata görə, baş məşqçi “Qalatasaray”ın “Real”la qarılaşmaya hazır olduğunu bildirib.

“Püşkatmada bəxtimizə qarşısına Çempionlar Liqasının qalibi olmaq vəzifəsinit qoymuş komanda düşdü. “Real”ın heyətində dünyanın ən məşhur futbolçuları var. Bundan başqa, “Real”ın məşqçisi yəqin ki, planetin ən yaxşısıdır. Biz kiminlə qarşı-qarşıya olduğumuzu çox yaxşı bilirik. Amma Çempionlar Liqasında gücümüzü göstərmişik”.

Fatih Terimin fikrincə, nəticədən asılı olmayaraq, “Real”la qarşılaşma böyük oyun olacaq: “Narahat deyilik və özümüzü yaxşı tərəfdən göstərməyə çalışacağıq. Əminəm ki, hər iki oyun baxımlı olacaq. “Real” öz meydanında çox effektli oynayır. Madridlilər bu stadionda böyük uğurlara imza atıblar. Onların heyətində dünyanın ən təhlükəli və güclü futbolçularından biri var. Söhbət Kriştianu Ronaldudan gedir”.

Baş məşqçi deyib ki, “Qalatasaray” “Real”a qarşı sürətli oyun oynamaq niyyətindədir. Onun sözlərinə görə, istanbullular təslim olmaq niyyətində deyillər və ölkələrinə yaxşı nəticə ilə qayıtmaq istəyirlər: “Belə oyunlarda hər şey ola bilər. Məğlubiyyət bizi təəccübləndirməyəcək. Lakin qalib gəlsək, deməli, belə də olmalıdır”.

Qeyd edək ki, “Real” - “Qalatasaray” oyunu bu gün keçiriləcək.