Fransada Nizami Gəncəvinin həyat və yaradıcılığına həsr olunan sərgi təşkil edilib

Noyabrın 12-də Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə Nizami Gəncəvinin həyat və yaradıcılığına həsr olunan sərgi təşkil edilib. Sərgi Parisdəki Məktublar və Əlyazmalar Muzeyində keçirilib. Sərgidə muzeyin təsisçisi və prezidenti Jerar Leritiye bildirib ki, sərgi Azərbaycanın görkəmli şairi Nizami Gəncəvinin həyat və yaradıcılığından bəhs edir. O, həmçinin, sərginin onun rəhbərlik etdiyi müəssisədə təşkil olunmasından böyük məmnunluq hissi keçirdiyini deyib.

Muzeyin səlahiyyətli nümayəndəsi Paskal Fülaşe isə  Nizami Gəncəvi kimi dünyəvi şairin Fransada az tanınmasından təəssüf hissi keçirdiyini bildirib. Şairin beş poemasının toplandığı “Xəmsə” əsərinin dünya ədəbiyyatında “Beş xəzinə” adı altında tanındığını qeyd etməklə yanaşı, dahi söz ustasının əlyazmalarının dünyanın nüfuzlu muzey və kitabxanalarında, o cümlədən İstanbul, Tehran, Qahirə, San-Peterburq, London, Paris və Berlinin kitabxana və muzeylərində qorunub saxlanıldığını bildirib.

Sərgidə Gəncə şəhərinin qədim və müasir görünüşlərinin, müxtəlif yerlərdə qoyulan büst və heykəllərin, N.Gəncəvinin adını daşıyan elm və mədəniyyət ocaqlarının əks olunduğu fotolar, onun əsərlərindən ibarət illüstrasiyaların təsvir edildiyi xalçalar, şairin yaşadığı dövrə məxsus geyimlər, dulusçuluq və misgərlik nümunələri nümayiş etdirilib.

 Qonaqlara Nizami Gəncəvinin həyat və yaradıcılığından bəhs edən kitablar və broşürlar paylanıb.