Gənc şairə Nuranə Nurun yeni şeirləri

Gənc şairə Nuranə Nur yeni şeirlərini "Veteninfo.az"da oxucuları ilə bölüşür.

Çərpələng

Gözlərim hələ də,
uşaqkən uçurtduğum çərpələngi axtarır göylərdə.
Bəlkə də hardasa,
hansısa buludun üstündə yaşayır hələ də...
Bəlkə, bulud da o vaxtdan ağlamır onun xətrinə.
Günlərdən bu gün deyildi onda,
tumurcuq hisslərim  hələ açılmamışdı.
Bilmirdim,
hər mələyin qorumağa bəndəsi olduğunu.
Əllərimi də uçurmuşdum göylərə,
körpə əllərimi...
O gündən hər üfüqə dalanda
əllərim əl yelləyir mənə.
Siz heç,
birini vuraraq ona vuruldunuzmu?
Yoxsa siz də mənim kimi...
Ehh...
Vurmaq üçün mənə əllərim gərək olmadı.

O belə deyir…

Könlümə uzaqlara getmək düşür hərdən
Tuta bilməyəcəyimi bildiyim üçün
Söz vermirəm nə vaxt, hara...
Çıxıb getmək bu şəhərdən
Sakitcə, üzr istəyib bir nəfərdən
Getməliyəm.
Belə inanmalıyam həyatın
Su kimi bir qabda dura bilməyəcəyinə
Getməyimlə bunu sübut etməliyəm.
Bir gün getməliyəm deyə,
Dırnağından yaxaladığım ümüdlərim də
sürüşür əlimdən.
Bir gün getməliyəm,
Uzaqlaşmalıyam ondan.
Və hər dəfə onu xatırlayanda,
kiməsə baxıb “yox! bu o deyil!”deyib
unutmağa çalışmalıyam.
Və yurdunu tərk edib gedən köçəri quşlar kimi
mütləq geri dönməliyəm.
O,belə deyir...

Şeir üzlüm

Gedərkən arxanca atdım,
yaz yağıslarından topladığım göz yaşlarımı.
Düsünmək unutmaq cəhdimdi,
qüsurlarını xatırlamaq da sənə toxunmaqdı.
Şeir üzlüm,
Şairlər qısqanar bu adı sənə.
Yağışlar bulutlara qayıdanda gəlimmi?
Bəlkə də söz verdim,gələ bilmədim
Təkcə sevmək azdı günahımdan keç
Gəlib pəncərənə yağa bilmədim
Sizin qapınızı tanımadım heç…