Hacı Qalibdən sərt cavab (eksklüziv)

“Hüquq Müdafiə Təşkilatları Monitorinq Qrupuna üzv olan hüquq müdafiəçiləri müxalifətin, İctimai Palataya (İP) daxil olan partiyaların vəkilləri deyillər”. Bu fikirləri “Vətəninfo.az”-a açıqlamasında millət vəkili Hacı Qalib Salahzadə bildirib. 

“Mən həqiqəti demişəm. Bu gün müxalifətlə görüşən, konkret olaraq İP-də təmsil olunan partiyalarla görüşə gedən Avropa Birliyinə daxil olan ölkələrin səfirləri diplomat səlahiyyətlərini aşmaqla bərabər, diplomatik mədəniyyətdən də kənara çıxıblar”,– deyə bildirən Hacı Qalib Salahzadə əlavə edib ki, heç bir səfirə haqq verilməyib ki, onlar Azərbaycanın daxili işlərinə qarışsınlar:

“Bu gün o səfirlərə diqqət yetirsəniz görərsiniz ki, onlar Azərbaycnda özlərini bu qədər sayılıb seçilən kimi göstərirlər. Ancaq öz ölkələrində onları heç tanıyanda yoxdur. Necə olur ki, ölkəsində elə də ciddi siyasi fiqur olmayan diplomatlar Azərbaycanda bu qədər özlərini sərbəst aparırlar”. 

Millət vəkili onu çatdırıb ki, o, Monitorinq Qrupuna daxil olan qadın hüquq müdafiəçilərinə cavab vermək istəmir: “Görünür müxalifət partiyalarının liderləri mənim ortaya qoyduğum mövqeyə cavab verə bilmədikləri üçün, qadınıların dili ilə mənə cavab verməyə çalşırlar”.

Oral MƏDƏNÇİ