Məni dənizim gözləyir!

Afaq Şıxlı

(Məni yoldan eləməyin,
məni dənizim gözləyir. Nigar Rəfibəyli)

Mən, gözləri yolda qalan bir dənizin övladıyam,
selə dönüb qayıdaram.
Günlər gələr günlər üstə...,
ilə dönüb qayıdaram.
Mən, Günəşi nisgilləri yox eyləyən bir vətəndən
ayazlara köç etmişəm.
Bugün,sabah deyə-deyə
Vətən boyda sevincimi puç etmişəm.
Qoruyuram, bəsləyirəm o sevgini
mən ağzımda dilim kimi.
Bu dünyada yox elə yer!  –
öz Vətənim, elim kimi!
İnsaf edib dincəlmir də
ürəyimdə bu ağrılar...
Sızım-sızım sızladacaq duyğuların
“həsrət” adlı bir adı var!
Bilirəm ki,
nə zamansa saçlarımı sığallayan külək yenə əsir orda....
Sevinc də var, gülüş də var,
Yenə,
 məndən uzaqlarda...
 Bilirəm ki,
hələ mənə vəfalıdır,
itib getmir, -
Sahildə izim gözləyir.
Ey ayazlar,
ey sazaqlar,
Məni yoldan eyləməyin,
məni dənizim gözləyir!