Göygöl rayon sakini Hacıyeva Elmira Əli qızı mərhum həyat yoldaşı  Hacıyev Rasim Məmməd oğluna şəhid statusunun  verilməsi ilə bağlı müvafiq dövlət təşkilatlarına edilən müraciət nəticəsiz qalıb.

Şikayətçinin sözlərinə görə, könüllülərdən ibarət əsgərlərin təlimi zamanı mina partlayışı nəticəsində R.Hacıyevlə bərabər şəhid olan şəxslərin bəzilərinə şəhid statusu verilib. 

Səfərbərlik və Hərbi Xidmətə Çağırış üzrə Dövlət Komitəsi vətəndaşın müraciətinə cavabda bildirilib ki, "Şəhid adının əbədiləşdirilməsi və şəhid ailələrinə edilən güzəştlərin tətbiqi qaydaları”nda dəyişiklik edilməsi barədə 15 iyul 2009-cu il tarixli 107 nömrəli qərarın  tələblərinə uyğun olaraq, 1965-ci il təvəllüdlü R.Hacıyevə şəhid adının verilməsinə aydınlıq gətirilməsi məqsədi ilə tərəfimizdən Müdafiə Nazirliyinə sorğu-məktub göndərilib. Lakin alınan cavablar qanunvericiliklə müəyyənləşdirilmiş qaydada qərar qəbul edilməsində çətinliklər yaradır. Bu da mərhum R.Hacıyevin yaxın qohumlarının narazılığına və şikayətlərinin çoxalmasına səbəb olur.

"Şəhid adının əbədiləşdirilməsi və şəhid ailələrinə edilən güzəştlər haqqında” 03.09.1993-ca il tarixli qanunu, Nazirlər Kabinetinin 15.01.1994-cü il tarixli "Şəhid adının əbədiləşdirilməsi və şəhid ailələrinə edilən güzəştlərin tətbiqi qaydalarının təsdiq olunması haqqında” qərarına əsasən Azərbaycan Respublikasının azadlığı, istiqlaliyyəti, suverenliyi və ərazi bütövlüyü uğrunda həlak olan, hərbi əməliyyatda itkin düşmüş və qanunvericiliklə müəyyən edilmiş qaydada ölmüş hesab edilən şəxslərin və onların ailələrinin statusunun və sosial müdafiəsinin tənzimlənməsi, həyata keçirilməsi üzrə əsas tələbləri müəyyən edir.  Göstərilən qanun və qərarın tələbinə əsasən mərhum R.Hacıyevin şəhid hesab edilməsinə qanunu əsas yoxdur. O da bildirilir ki, Seyfəli poliqonu Şəmkir rayonunun ərazisinə aiddir və döyüş zonası sayılmır. /bizimyolinfo/