Prosineçkinin ilk, millinin 3-cü səfər matçı

Bu gün futbol üzrə Azərbaycan milli komandası AVRO-2016-nın seçmə mərhələsində növbəti oyununu keçirəcək. H qrupunda yer alan yığmamız Norveç millisinin qonağı olacaq.
Bu tsikldə 3-cü səfər matçına çıxacaq millimiz ümumilikdə 6-cı oyununu keçirəcək. Əvvəlki iki səfər qarşılaşması komandamız üçün uğursuz nəticələnmişdi.
O vaxt Berti Foqtsun çalışdırdığı millimiz Xorvatiyadan 0:6, İtaliyadan isə 1:2 hesablı məğlubiyyətlə dönmüşdü.
 Komandamızın baş məşqçisi Robert Prosineçki üçün isə bu, ilk səfər görüşü olacaq. Xorvat mütəxəssis ümumilikdə 3-cü dəfə əsas komandamızı oyuna çıxaracaq. Əvvəlki iki oyunun biri rəsmi (Malta ilə Bakıda 2:0), digəri isə hazırlıq matçı (Serbiya ilə Avstriyada 1:4) olub.
Bu, həm də skandinaviyalılarla cari mərhələdə ikinci görüşümüz olacaq. İlk oyunda Bakıda rəqibə 0:1 hesabı ilə yenilən millimiz revanş arzusundadı.
Norveçlə əvvəlki qarşılaşmalarda millinin nəticələri o qədər də ürəkaçan deyil. DÇ-1998-in seçmə mərhələsində də evdə tək qola üzülmüşdük. Ancaq o vaxtkı səfər qarşılaşması bizim üçün daha acınacaqlı olmuşdu – 0:5.

AVRO-2016-nın seçmə mərhələsi
H qrupu

 12 iyun

23:45. Norveç – Azərbaycan

Baş hakim: Pavel Gil (Polşa)

Oslo. “Ullevol” stadionu

Apasport.az