Putinin göstərişinin arxasında dayanan SİRR

“Rusiya prezidenti Putinin Ermənistanla hərbi-texniki əməkdaşlığın inkişafi ilə bağlı müqavilənin bağlanması üçün danışıqlar aparılması barədə qərarını birmənalı şərh etmək mümkün deyil”.

Veteninfo.az-ın Bizimxeber.az-a istinadən verdiyi məlumata görə, bunu Rusiya mətbuatına açıqlamasında hərbi ekspert David Arutunov bildirib. Ekspertin sözlərinə görə, hazırda iki ölkə arasında mövcud olan razılaşmalar bu sahəni inkişaf etdirməyə kifayət qədər əsas verdiyindən göstərişdə söhbətin məhz nədən getməsi barədə birmənalı fikir yürütmək çətindir: “Putinin hərbi-texniki əməkdaşlığın inkişafı ilə bağlı göstərişi belə düşünməyə əsas verir ki, söhbət müxtəlif tipli silahların Ermənistana göndərilməsindən və istehsal sahəsində əməkdaşlıqdan gedə bilər”.

Digər tərəfdən ekspert belə hesab edir ki, yeni qərar özündə geosiyasi məqamları əks etdirir: “Bu geosiyasi məsələ də ola bilər. Birincisi, Rusiya Ermənistanın, eləcə də regionun təhlükəsizliyinə nəzarət edilməsi ilə bağlı təsir rıçaqlarını möhkəmləndirməyə çalışır. Digər tərəfdən Azərbaycanın İsraillə hərbi-texnika sahədə əməkdaşlığı fonunda Moskva regionda balansı qorumağa çalışdığını nümayiş etdirir”.

“Milli müdafiə” jurnalının baş redaktoru İqor Korotçenkonun sözlərinə görə isə, söhbət ilk növbədə Ermənistana silah verilməsindən gedir: “Ermənistan bizim Zaqafqaziyadakı tərəfdaşımızdır. Bizə hər cəhətdən yaxın olan ölkədir. Erməni hərbi kadrların hazırlanması, ordunun formalaşdırılmasında Rusiya hər cür köməyə hazırdır”.

Veteninfo.az