Qasırğa nəticəsində beş nəfər xəsarət alıb

Kyodo informasiya agentliyinin verdiyi məlumata görə, Okinava prefekturasında güclü "Qoni” qasırğası nəticəsində beş nəfər xəsarət alıb.

Ötən gecə Okinava prefekturasının İsiqaki adasında küləyin sürəti rekord həddə - saniyədə 71 metrə çatıb. Şüşə qırıntıları və yıxılma nəticəsində beş nəfər müxtəlif dərəcəli bədən xəsarətləri alıb. Küləyin aşırdığı avtomobillər və kökündən çıxardığı ağaclar barədə də məlumatlar var.

Okinava mətbuatının yaydığı məlumata görə, tufan iki kiçik gəmini də batırıb. Bunlardan biri balıqçı barkası, digəri isə üzgüçülük üçün katerdi. Hadisədən zərər çəkən olmayıb. Bəzi yerlərdə elektrik xətlərinin qırıldığı, işıqforların işləmədiyi bildirilir.

Okinavanın ən böyük şəhəri olan Nahedə yapon aviaşirkətləri 111 reysi təxirə salıblar.

Yaponiya Meteorologiya Agentliyinin yaydığı məlumatda avqustun 25-də səhər "Qoni”nin Kyuşü adasına çatacağı bildirilir. Tufanın güclü külək və 9-12 metr hündürlüyündə dalağalar gətirəcəyi gözlənilir.

 AZƏRTAC