Qəzalı məktəb köhnə kolxoz idarəsinə köçürüldü

Sentyabrın 4-də baş vermiş zəlzələ nəticəsində Oğuzun Padar kəndindəki məktəb binası yararsız hala düşüb. Bina təmir edilənədək uşaqlar digər dövlət idarələrinin binasında yaradılmış siniflərdə təhsil alacaqlar.

Vətəninfo.az xəbər verir ki, bu barədə virtualaz.org saytına Təhsil Nazirliyindən məlumat veriblər.

Nazirlikdən dedilər ki, 290 şagirdin təhsil aldığı Padar kənd tam orta məktəbində 17 sinif olub. Hazırda həmin siniflərdən 4-ü kənd bağçasının, 6-sı köhnə kolxoz idarəsinin, 7-si kənd xəstəxanasının binasında tədrisi davam etdirir.

Zəlzələ ocağına yaxın rayonun Astraxanovka kəndində də məktəb binası yeraltı təkanların gücündən ciddi şəkildə zədələnib.

Nazirlikdən qeyd etdilər ki, məktəb binaları tam təmir olanacaq.

Qeyd edək ki, həmin məktəbdə kənd seçki məntəqəsi fəaliyyət göstərdiyindən binanın qəzalı vəziyyətə düşməsi nəticəsində məntəqənin digər əraziyə köçürülməsi barədə də MSK qarşısında məsələ qaldırılıb.