Qvardiola: “Real”ı udsaq, çempion olacağıq”

“Barselona”nın baş məşqçisi Xosep Qvardiola bu gün Bakı vaxtı ilə saat 23.00-da Madrid “Real”ına qarşı keçiriləcək İspaniya çempionatının oyunu ilə əlaqədar mətbuat konfransı keçirib. “Vətəninfo”nun “Qol.Az”a istinadən verdiyi xəbərz görə, Qvardiola bildirib ki, qələbə qazanmaq üçün əllərindən gələni edəcəklər: “Real” bir neçə gün əvvəl Çempionlar Liqasında qarşılaşdığımız “Çelsi”dən fərqli olaraq, müdafiədə daha az oynayır. “Real” güclü və hər zaman yaxşı futbol oynayan komandadır. Bizə problem yarada bilərlər. İndi aramızda dörd xal fərq var. Amma qələbə qazansaq, çempion olacağımızı düşünürəm. Hər hansı xal itirsək isə “Real”ı çempionluğa görə təbrik edəcəyəm”. Qvardiola qeyd edib ki, “Barselona”nın oyun sistemi bütün rəqiblərinə problem yarada bilir: “Real” daha çox cinahlardan oyun qurmağa üstünlük verəcək. Eyni zamanda hava toplarıyla oynamaqla hücum qurmağa çalışacaqlar. Bunu əngəlləmək üçün matçda topun bizdə daha çox qalması lazımdır”. Qvardiola “Real”la oyun ərəfəsində komandada bəzi futbolçuların xırda zədələri olduğunu da deyib: “Aleksis Sançes məşqə çıxsa da, ağrıları davam etməkdədir. Dünənə nisbətən bu gün daha yaxşıdır. Sabah zədəsinin düzəlməsində yenə inkişaf ola bilər. Amma oynayıb-oynamayacağı hələ bilinmir. Puyol və Maskerano isə hazırda oynaya bilərlər. Pikeni “Çelsi”ylə matçda yüngül zədəsinə görə oynatmamışdım. Onun durumunda bir sıxıntı yoxdur”.