“Saakaşvilinin işi bitib”

İvanişvilinin isə...

Gürcüstanın sabiq prezidenti Eduard Şevardnadze bildirir ki, Bidzina Ivanişvilinin siyasi fəaliyyətini əvvəldən diqqətlə izləyib. Onun bu ilin oktyabrında keçirilmiş parlament seçkilərində qalib gələcəyinə də əmin imiş. Eks-prezidentin Gürcüstanın “Kvela siaxle” qəzetinə aşıqlamasını “Regnum” İnformasiya Agentliyi yayıb.

Şevardnadzenin qənaətincə, indiki prezident Mixail Saakaşvilinin başçılıq etdiyi “Milli Hərəkat”ın işi bitib.

Baş nazir Bidzina Ivanişviliyə gəlincə, sabiq dövlət başçısı onun düzgün yolda irəlilədiyini düşünür və deyir: “Vacib olan budur ki, o, bu yolda önəmli səhvlər etməsin”.

Eduard Şevardnadzenin fikrincə, “Milli Hərəkatı”ın xarakterik özəlliyi zorakılıq olub. O buna misal kimi 2012-ci ilin sentyabrında yayılan kadrları gətirib. Eks-prezident 300-dək adamın həbsə düşməsini də gürcü xalqının faciəsi adlandırıb. Eks-prezidentin sözlərinə görə, avropalı diplomatlar həmişə onunla görüşlərdə çoxsaylı həbslərə görə narahatlıqlarını dilə gətiriblər. /azadliqRadiosu/