Şuşanın işğal günü

Vahid Aslan

Bu gün də yığışıb verdik baş-başa,

Qeyd etdik Şuşanın işğal gününü;

Hələ də düşmənə əsirdi Şuşa,

Hələ də ümiddən asıb özünü;

Şuşa günü-gündən erməniləşir,

Bizsə,.. gözləyirik nəyi, bilmirəm?

Düşmənin təhqiri bağrımı deşir,

Cavab vermirəmsə, niyə ölmürəm...

Zaman uzandıqca ümid nazilir,

Hansı siyasətdən danışırıq biz;

Orda - əsirlikdə Şuşa inləyir,

Burda – vəzifəyçün dalaşırıq biz;

Dayan! Çıxışını saxla bu yerdə,

Sözlə oynamaqdan nə çıxar axı...

Mən görə bilmirəm əlac, bu dərdə,

Əgər, unutmasaq, unutqanlığı.

08.05.12.