Tofiq Yaqublu həbs olundu

Müsavat başqanının müavini Tofiq Yaqublu Cinayət Məcəlləsinin 233-cü maddəsi ilə ittiham olunur. Bu sözləri “Qafqazinfo” ya açıqlamasında Müsavat başqanının müavini Yeganə Hacıyeva bildirib. 

Onun sözlərinə görə, hazırda Nəsimi rayon məhkəməsində Tofiq Yaqublunun işinə baxılır. Onun barəsində iki aylıq həbs qətimkan tədbirninin seçiləcəyi gözlənilir.

Qeyd edək ki, Tofiq Yaqublu və REAL sədri İlqar Məmmədov yanvarın 24-də İsmayıllıda əhalini iğtişaşlarda iştirak eməyə çağırmaqda ittiham olunurlar.

Xatırladaq ki, 233-cü maddədə qeyd olunur. İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə. İctimai qaydanı kobud surətdə pozan və ya hakimiyyət nümayəndəsinin qanuni tələblərinə tabe olmamaqla əlaqədar olan, yaxud nəqliyyatın, müəssisə, idarə və təşkilatın normal fəaliyyətinin pozulmasına səbəb olan hərəkətlərin bir qrup şəxs tərəfindən törədilməsini təşkil etmə və ya bu cür hərəkətlərdə fəal iştirak etmə—

— beş yüz manatdan min manatadək miqdarda cərimə və ya iki ilədək müddətə islah işləri və ya eyni müddətə azadlığın məhdudlaşdırılması və ya üç ilədək müddətə azadlıqdan məhrum etmə ilə cəzalandırılır.