Ukrayna ATƏT-ə sədrliyinin prioritetlərini açıqladı

Ukrayna 2013-cü ildə ATƏT-ə sədrliyi qəbul edib. APA-nın məlumatına görə, Ukraynanın xarici işlər naziri, ATƏT-in fəaliyyətdə olan sədri Leonid Kojara ölkəsinin sədrlik müddətində prioritetlərini açıqlayıb.

L. Kojara bildirib ki, Ukrayna sədrlik müddətində uzanmış münaqişələrin həlli, adi silahlara nəzarətin gücləndirilməsi, insan alverinə qarşı mübarizə, enerji fəaliyyətinin ətraf mühitə təsirinin azaldılması, insan haqları və əsas azadlıqların müdafiəsi məsələlərinə xüsusi diqqət yetirəcək.

L. Kojara Ukraynanın Dnestryanı münaqişəsinin nizamlanması prosesində vasitəçi və qarant kimi rolunu xüsusi qeyd edib, ötən il danışıqların gedişində müşahidə olunmuş dinamikanın alqışlayıb.  

O, bu və regiondakı digər münaqişələrin həlli istiqamətində tərəqqiyə nail olmağın zəruriliyini vurğulayıb: “Biz bu formatlarda danışıqlara yeni təkan verməli, baş qaldıra biləcək istənilən gərginliyə qarşı çıxmalıyıq. Münaqişələrin həlli ATƏT və bütün iştirakçı ölkələr üçün əsas prioritet olmalıdır”.

L. Kojara İrlandiyanın 2012-ci ildə ATƏT-ə sədrliyini yüksək qiymətləndirib, əmin edib ki, Ukrayna ATƏT XİN Şurasının 2012-ci ilin dekabrında Dublində keçirilmiş iclasında əsası qoyulmuş “Helsinki+40” prosesinin inkişafı üçün səylərini əsirgəməyəcək.  

O, Ukraynanın ATƏT-ə sədrliyinin prioritetlərini ATƏT Daimi Şurasının yanvarın 17-də Vyanada keçiriləcək iclasında təqdim edəcəyini bildirib.