Azərbaycanlı deputat təhsil ocaqlarında Azərbaycan dilinin tədrisini tələb edir

İran parlamentinə Təbriz, Üskü və Azərşəhr şəhərlərindən seçilən azərbaycanlı Məhəmməd İsmayıl Səidi jurnalistlərə açıqlamasında ölkənin ali təhsil ocaqlarında Azərbaycan dilinin tədris olunmasını tələb edib.

“Vətəninfo.az”ın “Media forum” saytına istinadən verdiyi xəbərə görə, Məhəmməd İsmayıl Səidi deyib ki, Azərbaycanın ali təhsil ocaqlarında və məktəblərində türk dilinin (Azərbaycan dili) tədris olunması yerli əhalinin əsas tələblərindən biridir: “Ölkə rəsmiləri, eləcə də deputatlar əhalinin bu istəyinə fikir verməlidir. Hökumət və rəsmilər Azərbaycan dilinin tədrisi üçün insanlarda maraq və rəğbət yaratmalıdır. İslami İrşad və Mədəniyyət Nazirliyi isə dilin tədrisi üçün çatışmayan kitab və dərsliklərin çap olunub yayılmasına təşəbbüs və yardım göstərməlidir”.