Bakıda çökən yol iki idarə arasında qalmaqala səbəb oldu

Bakının Xətai rayonunda Babək prospekti ilə Telnov küçəsinin kəsişməsindəki yolda baş verən çökmə “Azəryolservis” ASC ilə “Azərsu” ASC arasında qalmqala səbəb olub.

Vətəninfo.az-ın məlumatına görə,  “Azəryolservis” ASC-nin mətbuat xidmətinin rəhbəri Pünhan Mürsəliyev APA-ya açıqlamasında yolda baş verən çəkməni ərazidən keçən su borusunda baş verən sızma ilə əlaqələndirib.

“Çökən yolun yanında ayrıca zolaq var. Bu hissədən su axmağa başlayıb. “Azərsu” ASC-nin əməkdaşları hadisə yerində araşdırma aparıblar. Məlum olub ki, həmin ərazidən iki ədəd 700 mm diametrlik su borusu keçir. Boruların biri-birinə qaynaq olunan hissəsində çat olduğu aşkarlanıb. Bu çatdan su axaraq, yolun torpaq yatağını yuyub və yolun çökməsinə səbəb olub”, - deyə P. Mürsəliyev bildirib.

 

Onun sözlərinə görə, hazırda problemin aradan qaldırılması istiqamətində iş gedir.

 

"Azərsu"dan verilən açıqlama da isə yolun çökməsinin onlara heç bir aidiyyatı olmadığı bildirilib.

"Bakı Sukanal idarəsinin əməkdaşları ərazidə araşdırma aparıblar. Məlum olub ki, Babək prospektində yolun çökməsinin ərazidən keçən su xətləri və ya xətlərin köçürülməsi ilə heç bir əlaqəsi yoxdur".

 

Məlumatda deyilir ki, həmin ərazidən 700 mm diametrli Hövsan xətti keçir və bu xətdə heç bir sızma yoxdur: “Yeni piyada keçidinin tikintisi ilə əlaqədar kommunikasiya xətlərinin ərazidən köçürülməsi 1 ilə yaxındır yekunlaşıb və o vaxtdan yolda heç vaxt çökmə müşahidə olunmayıb”.