Bayram günləri Nizami Kino Mərkəzində yeni filmlər nümayiş olunacaq

Sentyabrın 24 –dən etibarən Nizami Kino Mərkəzində ABŞ, Böyük Britaniya, İslandiyanın istehsalı olan "Everest" , "Stajçı" (ABŞ) və "Gecə qonağı" (Azərbaycan) filmlərinin nümayişinə başlayacaq.

Vətəninfo.az-ın məlumatına görə, Kino Mərkəzindən AZƏRTAC-a bildirilib ki, rejissor Baltasar Kormakurun real hadisələr əsasında çəkdiyi "Everest" filmi triller, dram və macara janrındadır.

Filmdə rolları Ceyson Klark, Coş Brolin, Con Houks, Robin Rayt, Emili Uotson, Kira Naytli, Sem Uortinqton, Ceyk Cillenxol, Tomas M. Rayt, Martin Henderson və başqa aktyorlar canlandırıblar.

Komediya janrında çəkilmiş "Stajçı" filminin ssenari müəllifi və rejissoru Nensi Mayersdir. Ekran əsərində rolları Enn Xeteuey, Robert De Niro, Rene Russo, Nat Vulf, Drena De Niro və başqaları ifa ediblər.

"Gecə qonağı" adlı yeni filmi isə azərbaycanlı rejissor Kənan MM çəkib. Ekran əsəri dram janrındadır. Filmin sonluğu tamaşaçı üçün gözlənilməz olacaq. Filmdəki obrazları aktyorlar Fərda Amin, Pərvin Abiyeva, Tural Əhməd, Kəmalə Piriyeva, Kənan MM və başqaları canlandırıblar.

Filmlər haqqında daha ətraflı məlumatı Nizami Kino Mərkəzinin facebook səhifəsindən öyrənmək olar.