Cahangir Hacıyev məhkəməyə müraciət etdi - Sovqat istəyir

"Azərbaycan Beynəlxalq Bankı” ASC-nin İdarə Heyətinin sabiq sədri Cahangir Hacıyev Daxili İşlər Nazirliyinin (DİN) Baş Mütəşəkkil Cinayətkarlıqla Mübarizə İdarəsini (BMCMİ) daha iki üzrə məhkəmə verib.

Bu barədə "Report”a C.Hacıyevin vəkili Aqil Layicov məlumat verib.

Belə ki, C.Hacıyev ona gətirilən sovqatın qəbul edilməsini, sovqatın qəbul edilməmisinin qanunsuz sayılmasını, həmçinin vəkillə özü arasındakı yazışmalarda konfedensiallığın pozulmasının qanunsuz hesab edilməsini istəyir.

Bundan başqa, C.Hacıyev BMCMİ-də saxlanılmasının qanunsuz sayılması barədə də məhkəmədə iddia qaldırıb.

Hər üç iddiaya sabah – dekabrın 17-də Nərimanov Rayon Məhkəməsində baxılacaq.

Xatırladaq ki, C.Hacıyev dekabrın 5-də həbs edilib. Onun barəsində Nərimanov Rayon Məhkəməsində 4 ay müddətinə həbs qətimkan tədbiri seçilib. Həmin qərarın ləğv olunması barədə apellyasiya şikayəti verilib. Lakin Bakı Apellyasiya Məhkəməsində apellyasiya şikayəti təmin edilməyib.

C.Hacıyev Cinayət Məcəlləsinin 179.1 (mənimsəmə və ya israf etmə, yəni təqsirkara etibar edilmiş özgə əmlakını talama) və 308-ci (vəzifə səlahiyyətlərindən sui-istifadə etmə) maddələri ilə ittiham olunur.