Deputat əvvəlcə aprel döyüşlərində şəhid olmuş Azərbaycan Ordusunun giziri Pəncəli Teymurovun doğulub boya-başa çatdığı Əzərud kəndinə gedib. R.Mahmudov orada Astara rayon icra Hakimiyyətinin başçısı Qəzənfər Ağayev, Yeni Azərbaycan Partiyasının üzvləri ilə birgə şəhidin valideynləri ilə görüşüb, il mərasimində iştirak edib. Onlar rayon ictimaiyyətinin nümayəndələri və Bakıdan gəlmiş bir qrup tanınmış ziyalı ilə birlikdə P.Teymurovun məzarını ziyarət ediblər.

Görüş zamanı kənd sakinləri müəyyən problemli məsələlərin həlli ilə bağlı fikir və təkliflərini millət vəkilinə çatdırıb və onların həlli istiqamətində də dəstəyini əsirgəməyəcəyinə inandıqlarını bildiriblər. Sakinlər özəlliklə iş yerlərinin artmasına xidmət edən layihələrə böyük ehtiyac olduğunu xüsusi vurğulayıblar. Sosial məsələlər, müavinətlər, yol, uçməli su, aztəminatlı ailələrin mənzil şəraitinin yaxşılaşdırılması, turizmin və çəltikçiliyin inkişafı, müalicə və müayinə məsələləri ilə bağlı təkliflər və mülahizələr irəli sürülüb.

R. Mahmudov bildirib ki, astaralılar ona etimad göstərib deputat seçdikdən sonra Milli Məclisdə onları və eləcə də ölkəni layiqincə təmsil etməyə çalışır. Millət vəkili xüsusilə vurğulayıb ki, dünyanın bu, qarışıq vaxtında prezident İlham Əliyevin rəhbərliyi altında inkişaf edən vətənimiz Azərbaycan üçün hər kəs səy göstərməlidir: "Biz hamımız birlikdə problemlərimizi aradan qaldırmalı, dövlətimizin başçısına dəstək olmalıyıq. Bunun üçün namusla işləmək, dürüst olmaq lazımdır. Əsl vətənpərvərlik də budur".