Xarici qonaqlar və din xadimləri akademik Zərifə xanım Əliyevanın da məzarını ziyarət edərək xatirəsini ehtiramla anıblar.  

        

 Xatırladaq ki, Dini Liderlərinin Qlobal Sammiti noyabrın 5-i və 6-da Bakıdakı "Gülüstan” Sarayında keçiriləcək. Ölkəmizin ev sahibliyi  edəcəyi Birləşmiş Millətlər Təşkilatının İqlim Dəyişikliyi üzrə Çərçivə Konvenssiyasının Tərəflər Konfransının 29-cu sessiyası ərəfəsində reallaşacaq Dini Liderlərinin Qlobal Sammiti Azərbaycan Prezidenti, Zati-aliləri İlham Əliyevin himayəsi altında təşkil edilir. "Dünya Dinləri Yaşıl Planet Uğrunda” şüarı altında keçiriləcək Sammitin tərəfdaşları qismində Azərbaycan Respublikasının Ekologiya və Təbii Sərvətlər Nazirliyi, Dini Qurumlarla İş üzrə Dövlət Komitəsi, Qafqaz Müsəlmanları İdarəsi, Beynəlxalq Müsəlman Ağsaqqalları Şurası və BMT-nin Ətraf Mühit Proqramı çıxış edir.  Dünya və ənənəvi dinlərin liderlərinin, müxtəlif konfessiyaları təmsil edən və dünya miqyasında tanınan din  və ictimaiyyət nümayəndələrinin qatılacağı Qlobal Sammitdə 55 ölkəni, 30 beynəlxalq təşkilatı, aparıcı KİV-ləri təmsil edən 220-dən çox qonaq iştirak edəcək.