Bu sözləri Pravda.az-a açıqlamasında Milli Məclisin deputatı Elşad Mirbəşiroğlu deyib.

 Deputat bildirib ki, Ermənistanın təxribatları hər zaman Azərbaycan və Ermənistan arasında sülh sazişinin imzalanmamasına xidmət edib: "Ən azından 2020-ci ildən bəri Ermənistan buna görə təxribatlar törədir. Bütün imkanların olduğu şəraitdə Ermənistan bu günə qədər Azərbaycanla sülh sazişi imzalamayıb. Bu da bir çox məqama aydınlıq gətirir. Məqsədi münaqişənin yenidən uzanması, gərginlik elementlərinin meydana çıxmasıdır. Ermənistanı buna sövq edən dairələr var – Avropa dairələri... Fransa başda olmaqla, onlar Ermənistanı son 3 ildə sistemli şəkildə silahlandırmaqdadırlar. Avropa öz missiyasını Ermənistana məhz kəşfiyyat işləri məqsədi ilə göndərdi. O, heç də mülki missiya deyil, Almaniyanın, Fransanın xüsusi xidmət orqanlarının nümayəndələrindən ibarətdir. Ermənistanın növbəti təxribatları gözlənilən idi. Təbii ki, Azərbaycan Ermənistanın təxribatlarına susqun reaksiya nümayiş etdirməli deyil. Ermənistanın bütün təxribatlarının qarşısı sərt şəkildə həmişə alınıb, bundan sonra da alınacaq. "Qisas əməliyyatı” həm də Ermənistanın himayədarlarına siqnal olmalıdır ki, görsünlər, Ermənistanı Cənubi Qafqaz regionunda gərginlik yaratmaq üçün alət kimi istifadə etmək bir işə yaramır. Əksinə, Ermənistanın təxribatları onun özünə öldürücü zərbələr vurmaqdadır”.