“İlham Əliyevin prezident seçilmək şansı daha çoxdur”

2013-cü ilin prezident seçkilərinin sürprizlərlə bol olacağını indidən söyləmək olar, ancaq kimin seçiləcəyini söyləmək üçün qarşı-qarşıya olan düşərgələrə diqqət yetirmək lazımdır. 

Bu sözləri “Veteninfo.az”a İsveçrə-Azərbaycan Ticarət Təşkilatının sədri, politoloq Elxan Həsənli qarşıdan gələn prezident seçkilərini şərh edərkən bildirdi.

“Hakimiyyət içərisində bir-biriylə mübarizə aparanlar olsa da, onlar son anda komandanın başcısı İlham Əliyevə tam tabedirlər. 

Ümumilikdə götürsək, hakim düşərgədə idarəçilik prinsipləri elə qurulub ki, həlledici anda bütün daxili çəkişmələr dayandırılır və bütün qüvvə ümumi işin müdafiəsinə cəmlənir. Bura daxili və xarici resursları əlavə etsək, vəziyyət heç də müxalifətin xeyrinə deyil”,-deyə qeyd edib.

Politoloq onu da əlavə etdi ki, iqtidarın əsas namizədinin İlham Əliyev olacağına şübhə demək olar ki, yoxdur: “Müxalifətin seçkiyə əsas namizədlə gedəcəyi isə böyük şübhə doğurur. Məhz bu vəziyyət deməyə əsas verir ki, İlham Əliyevin prezident seçilmək şansı daha çoxdur. 

Azərbaycan iqtidarında yalnız bir arxayınçılıq sezilməkdədir. Bu vəziyyət daxili resurslardan daha effektli istifadəni məhdudlaşdırmaqla yanaşı müstəqil elektorata laqeyd münasibət doğurur ki, bu da qarşı tərəfin xeyrinədir. Son dövrlərdə müxalifət bu vəziyyətdən istifadə edərək müstəqil elektoratdan dəstək ala bilib. 2013-cü ilin seçkilərində də əsas sözü müstəqil elektorat deyəcək”.

Elnur Eltürk