İsa Qəmbər YAP-ın namizədindən danışdı

Müsavat başqanı İsa Qəmbər İlham Əliyevin 3-cü dəfə YAP-ın namizədi olmasına münasibət bildirib.

“Deyerler.org”a açıqlama verən İ.Qəmbər deyib ki, YAP-ın namizədlik məsələsinin həll olunduğunu düşünmək çox tezdir:

“Son vaxtlar bu mövzuda şərhçilərin təhlilləri, o cümlədən hakimiyyət nümayəndələrinin özlərinin ziddiyyətli, bir o qədər də inamlı görünməyən açıqlamaları məsələnin kifayət qədər mürəkkəb olduğunun təsdiqidir. Aydın məsələdir ki, Yeni Azərbaycan Partiyası İlham Əliyevin namizədliyini irəli sürməyi düşünür. Amma bu məsələnin həll olunduğunu düşünmək çox tezdir. Bu mövzuda hakimiyyət daxilində çox ciddi diskussiyalar, sərt müzakirələr qarşıdadır və bu məsələni həll eləmək hakimiyyət üçün asan olmayacaq”.