Olimpiya İdman Kompleksinin yerləşdiyi ərazini su basdı

Yağışlı günlərin arxada qalmasına baxmayaraq, Suraxanı rayonu Hövsan qəsəbəsinin mərkəzi yerlərindən biri artıq neçə gündür su altında qalıb.

Vətəninfo.az Publika.az-a istinadən xəbər verir ki, qəsəbədə Elxan Qasımov küçəsinin bir hissəsini yağış suları basıb. Bu səbəbdən də Hövsan Olimpiya İdman Kompleksinin yerləşdiyi ərazi artıq 4 gündür avtomobillərin və sakinlərin gediş-gəlişi üçün əlverişsiz məkana çevrilib. Paytaxtın bir sıra idman oyunlarının keçirildiyi Hövsan Olimpiya İdman Kompleksinin yerləşdiyi ərazi tez-tez yağış suları altında qalır. Bütün bunlar isə həmin kompleksə üz tutan yerli və xarici idmançılar üçün problem yaradır.

Suraxanı rayon İcra Hakimiyyətinin şöbə müdiri Barxudar Barxudarov Publika.az-a problemin səbəblərinin araşdırılacağını və müvafiq tədbirlərin görüləcəyini bildirib.