Parlamentdə Ümumdünya Ticarət Təşkilatına üzvlük barədə məsələ qaldırıldı

“Azərbaycanın Ümumdünya Ticarət Təşkilatına (ÜTT) qəbulu sürətləndirilməlidir. Biz bu prosesi nə qədər tez başa çatdırsaq, bir o qədər Azərbaycanın qarşısında duran problemlərin həllinə yaxınlaşa bilərik”. Bu fikirləri Parlamentin İqtisadi siyasət komitəsinin dünən keçirilən növbəti iclasında çıxışı zamanı millət vəkili Vahid Əhmədov bildirib.
O deyib ki, ÜTT-nin tələblərindən biri odur ki, gömrük tarifləri və rüsumları dünya standartlarına uyğun olaraq düzgün müəyyənləşdirilsin:

“Biz gec-tez ÜTT-yə üzv qəbul olunacağıq. Ancaq elə rüsumlar və tariflər müəyyənləşdirməliyik ki, Azərbaycan ora daxil olduqda əziyyət çəkməsin”.

Daha sonra çıxış edən millət vəkili Əli Məsimli  Azərbaycanın ÜTT-yə daxil olmasının ləngiməsinin qızılca xəstəliyi ilə müqayisə edib:

“İnsan qızılca xəstəliyini nə qədər gec keçirirsə onun ağrıları da çox olur. Biz də nə qədər ki, ÜTT-yə qəbul məsələsini ləngidirik, işlərimizi də bir o qədər çətinləşdiririk. Ona görə də hesab edirəm ki, bu proses sürətləndirilməlidir”.

Millə vəkili Ziyad Səmədzadə isə çıxışında bildirib ki, bu proses zamanında öz həllini tapacaq:

“Cənab Prezident hələ dövlət başçısı seçilməzdən əvvəl, yəni, baş nazir olarkən bildirmişdi ki, ölkənin inkişafına nail olmaq üçün rəqabətə davamlı məhsulların istehsalına nail olmalıyıq. Bundan sonra ÜTT-yə daha rahat şəkildə daxil ola bilərik”.

Kamil

Vtəninfo.az