Qənirə Paşayeva Giresun Universitetinin rektoru Aygün Attarla görüşüb

"Veteninfo.az" xəbər verir ki, millət vəkili  Qənirə  Paşayeva Giresun Universitetinin rektoru Aygün Attarla və  bu universitetdə təhsil alan azərbaycanlı tələbələrlə görüşüb.

Qara  Dəniz Strateji  Araşdırma və Uyqulama Mərkəzi (KARASAM) tərəfindən təşkil edilən və Qara Dəniz İqtisadi Əməkdaşlıq Təşkilatına üzv ölkələrin siyasətçilərinin, alimlərinin, universitet  rəsmilərinin, qeyri-hökumət təmsilçilərinin qatıldığı  5-ci Qara Dəniz  Beynəlxalq Simpozium çərçivəsində millət vəkili  Qənirə Paşayeva Türkiyənin Giresun Universitetinin rektoru Aygün Attarla görüşüb. Görüşdə  Azərbaycan  ilə  Türkiyə arasında bütün sahələrdə olduğu kimi, təhsil sahəsində də əməkdaşlığın getdikcə daha da genişləndiyini bildirən  millət  vəkili  Qənirə Paşayeva  bunun  gələcəyimiz üçün böyük əhəmiyyət daşıdığını qeyd edib.  Millət vəkili  Qənirə Paşayeva  Universitet kollektivi qarşısında çıxışında  Azərbaycan  və  Türkiyənin haqlı davalarını ən yüksək  şəkildə  illərlə  həm böyüyən gənc nəsillərimizə, həm də beynəlxalq ictimaiyyətə çatdırılması yolinda dəyərli alim Aygün Attarın əməyinin hər kəs tərəfindən yüksən qiymətləndirdiyini və illərlə yaxından tanıdığı çox dəyərli dostunun, dəyərli insanın Giresun Universitetinə rektor təyin edilməsinə sevindiklərini deyib.  O, Aygün Attarın rektor təyin edilməsindən sonra Giresun Universitetinin sürətlə inkişaf etməsi barədə xəbərləri böyük məmuniyyətlə izlədiklərini də deyib. “Giresun təkcə universitetinə gözəl bir rektor qazanmayıb, həm də Giresunu hər yerdə ən gözəl şəkildə təbliğ edən bir səfir, böyükelçi də qazanıb”, – deyən millət vəkili  Qənirə Paşayeva Giresun Universitetində belə böyük beynəlxalq simpoziumun keçirilməsinin vacibliyi və əhəmiyyətindən də danışıb.

Giresun Universitetinin rektoru Aygün Attar da Azərbaycanın ali təhsil müəssisələri ilə artıq geniş əməkdaşlığa başladıqlarını və bu əməkdaşlığın sürətlə davam edəcəyini bildirib. O, rəhbərlik etdiyi Giresun Universiteti ilə Azərbaycanın ali  məktəbləri  arasında  əlaqələrin  daha da gücləndirilməsi üçün ciddi işlərin görüldüyünü və Giresun universitetində azərbaycanlı tələbələrin yaxşı təhsil ala bilməsi üçün hər cür imkanlar yaradıldığını deyib. O bildirib ki, hər il universitetdə təhsil alan azərbaycanlı tələbələrin sayının artacağına inanırlar. Azərbaycanla əməkdaşlığa böyük önəm verdiklərini deyən  Giresun Universitetinin rektoru Aygün Attar Azərbaycanın bütün istiqamətlərdə getdikcə daha da inkişaf etməsindən sevindiklərini də bildirib və iki  ölkə arasında bütün sahələrdə  münasibətlərin daha da inkişafından məmnunluğunu  da bildirib.

Millət vəkili Qənirə Paşayeva Universitetə ziyarəti çərçivəsində  rektor Aygün Attarla geniş fikir mübadiləsi apardıqdan sonra burada təhsil alan azərbaycanlı tələblərlə də görüşüb. Onlarla fikir mübadiləsi aparan millət vəkili Qənirə Paşayeva onların yaxşı təhsil alaraq yüksək səviyyəli peşəkarlar kimi ölkəmiz üçün gözəl fəaliyyət göstərəcəklərinə inandığını bildirib. Görüşün  sonunda  millət vəkili  Qənirə  Paşayeva  Giresun Universitetinin rektoru Aygün Attara Azərbaycan  həqiqətlərinə, mədəniyyətinə, tarixinə  dair materiallar,kitablar hədiyyə edib.

Elnur Eltürk