"Bakı 2015"ə qatılan ölkələrin bayraqlarının qaldırılma mərasiminin vaxtı açıqlanıb

 "Bakı 2015" I Avropa Oyunlarına qatılacaq 50 ölkənin nümayəndə heyəti üçün Atletlər Kəndində təntənəli salamlama və bayraqların qaldırılma mərasimi təşkil olunacaq. Vətəninfo.az  "Report"a istinadən xəbər verir ki, bu barədə Azərbaycan nümayəndə heyətinin rəhbəri Könül Nurullayeva məlumat verib.
Onun sözlərinə görə, təntənəli mərasim iyunun 11-də saat 18:00-da start götürəcək. Nümayəndə heyətləri Atletlər Kəndinin meri tərəfindən salamlandıqdan sonra bütün ölkələrin bayraqları qaldırılacaq. K.Nurullayeva bildirib ki, Olimpiya Oyunları ilə müqayisədə, Avropa Oyunlarında hər bir ölkə bayrağının ayrı-ayrılıqda deyil, eyni vaxtda dalğalandırılmasına qərar verilib.
Qeyd edək ki, tədbirdə rəsmi şəxslərin, o cümlədən, Azərbaycanda akreditə olunmuş diplomatik korpusların nümayəndələri və rəhbərlərinin iştirakı gözlənilir.