Şəkidə ata oğlunun evini yandırdı

Hadisənin isə ailə münaqişəsi zəminində baş verdiyi ehtimal olunur

Şəkidə ata oğlunun yaşadığı evi yandırıb. Vətəninfo.az APA-ya istinadən xəbər verir ki, hadisə rayonunBaş Layısqı kəndinin Qumux kəndində Rafiq İsa oğlu Xəlilovun yaşadığı, ümumi sahəsi 40 kv/m olan bir otaq və bir eyvandan ibarət kürsülü fərdi yaşayış evindəqeydə alınıb.

Yanğın baş verən əraziyə Fövqaladə Hallar Nazirliyinin (FHN) Şəki və Qax rayonlarının Dövlət Yanğından Mühafizə Hissələrinin texnikası və canlı qüvvəsi cəlb edilib. Yanğın nəticəsində ev içərisindəki əşyalarla birlikdə yanaraq kül olub.

Yanğınsöndürənlərin səyi nəticəsində evə bitişik altıaçıq və həyətyanı sahədə olan digər yaşayış evi yanğından mühafizə olunub.

Rafiq Xəlilovun və qonşularının  APA-ya verdiyi məlumata görə, yanan ev sənədlə Rafiq Xəlilovun atası 61 yaşlı İsa Xəlilova məxsusdur. Rafiq Xəlilovun dediyinə görə, evi elə onun atası İsa Xəlilov yandırıb. Hadisənin isə ailə münaqişəsi zəminində baş verdiyi ehtimal olunur. Faktla bağlı Şəki şəhər-rayon Polis Şöbəsi və FHN-nin Şəki rayon DYMH-də araşdırma aparılır.

Vətəninfo.az