Yaponiyada daşqınlar və torpaq sürüşməsi nəticəsində üç nəfər həlak olub

Yaponiyanın şərq hissəsinin yerli hakimiyyət orqanlarının bildirdiyinə görə, güclü yağışların əmələ gətirdiyi daşqınlar və torpaq sürüşmələri nəticəsində üç nəfər həlak olub, daha 23 nəfər isə itkin düşüb.

Xilasedicilər İbaraki prefekturasının Zyoşo şəhərində itkin düşmüş 22 nəfərin axtarışlarını davam etdirirlər. Sentyabrın 10-da burada Kinuqava çayı daşaraq şəhəri su altında qoyub. Yerli hakimiyyət orqanları 25 nəfərin itkin düşdüyünü bildirsə də, sonradan onlardan üçü ilə əlaqə yaradılıb. Daha bir nəfər Miyaqi prefekturasının Kurihara şəhərində itkin düşüb.

Həmin gün Nazirlər Kabinetinin xüsusi toplantısını keçirən Baş nazir Şinzo Abe müvafiq qurumlara təbii fəlakət zamanı ilk növbədə insanların həyatının xilas edilməsinə çalışmaları barədə göstəriş verib. Baş nazir, həmçinin zərər çəkmiş rayonlara yardımların çatdırlmasının təmin olunması, təhlükəli ərazilərdən insanların çıxarılması və bu zaman yerli orqanlarla birgə fəaliyyətin əlaqələndirlməsi barədə də tapşırıqlar verib.