Almaniya Bundestaqının və ictimaiyyətin narazılığına rəğmən, yaxın günlərdə Amerika Birləşmiş Ştatları bu ölkədəki hərbi bazaya yeni nüvə başlıqları yerləşdirəcək.

AZƏRTAC Almaniyanın "ZDF” telekanalına istinadla xəbər verir ki, yeni nəsil nüvə arsenalı Müdafiə Nazirliyinin Reynland-Pfalç Federal torpağındakı Fliegelhost Büxel hərbi bazasına gətiriləcək. KİV-ə hərbi ekspertlərdən sizan məlumata görə, Amerikanın taktiki B61-12 tipli nüvə silahı indiyədək hərbi bazada mövcud olan nüvə arsenalından son dərəcədə sərrastlığı ilə seçilir. Təlimata əsasən, əgər müharibə başlayarsa, Almaniya hərbi pilotları bu bombaları "Tornado” tipli təyyarələrlə NATO-nun müəyyən etdiyi strateji nöqtələrə çatdırmalıdır.

Ekspertlər təsdiqləyirlər ki, AFR yaxın illərdə Fliegelhost Büxel hərbi bazasına 120 milyon avro miqdarında investisiya ayırmağı planlaşdırır. Məhz bu kapital qoyuluşu ilə bazadakı hərbi aerodromun uçuş zolaqları təkmilləşdirilərək yeni müasir sistemlə təchiz ediləcək.

Bir çox almaniyalı siyasilər Vaşınqtonun Avropadakı bu addımlarını rəsmi Moskvaya qarşı düşünülmüş təhrik kimi qiymətləndiriirlər. Amerikanın yeni nüvə başlıqlarının Almaniyadan sonra Türkiyənin İncirlik və İtaliyanın Aviano hərbi bazalarında da yerləşdirilməsi nəzərdə tutulur.