Ağdaşda “Kitab bayramı”

Ulu öndər Heydər Əliyevin anadan olmasının 92-ci ildönümü ilə əlaqədar Ağdaş rayonunda “Kitab bayramı” keçirilib.

Vətəninfo.az AZƏRTAC-a istinadən xəbər verir ki, rayon icra hakimiyyətinin, mədəniyyət və turizm şöbəsinin mərkəzləşdirilmiş kitabxanalar sisteminin birgə təşkilatçılığı ilə Heydər Əliyev Mərkəzində keçirilən sayca 7-ci “Kitab bayramı”nda rayonun idarə və təşkilat rəhbərləri, kitabxana, mədəniyyət, təhsil işçiləri, məktəblilər iştirak ediblər.
Mərasimdə 1200-ə yaxın kitab nümayiş etdirilib. Tədbirdə ümummilli lider Heydər Əliyevin həyat və fəaliyyətinə həsr olunan nəşrlərə geniş yer verilib. Mərkəzin geniş foyesində humanitar, hüquq, sahibkarlıq, iqtisadiyyat, kənd təsərrüfatı sahələri üzrə ədəbiyyatlar, qədim kitablar sərgilənməklə yanaşı, monitorlar vasitəsilə Ulu Öndərin həyat və fəaliyyəti, Azərbaycan Prezidenti İlham Əliyevin ötən il mayın 1-də Ağdaş rayonuna tarixi səfəri ilə bağlı videomateriallar da nümayiş etdirilib.
Bayram tədbiri rayonun mədəniyyət kollektivlərinin konsert proqramı ilə başa çatıb.