Yaponiya hökumətinin "Ot kökləri və insan təhlükəsizliyi qrant yardımı” ilə Beyləqanda tikdirdiyi və bugünlədə açılışı olan ayaqyolu ilə bağlı müzakirələr gündəmdən düşmür. Məsələnin tənqid olunmasına isə rayon icra hakimiyyəti əsəbi reaksiya verib.

Rayon icra hakimiyyətinin başçısının 1-ci müavini Telman Məstanov "anspress”ə açıqlamasında deyib ki, KİV-in və ictimaiyyətin belə yüksək səviyyəli sanitar qovşağın açılışında başçının iştirakına verdiyi reaksiyanı başa düşə bilmir: "Bu çox yüksək səviyyəli sanitar qovşağıdır. Başçının iştirakına belə reaksiyanı anlaya bilmirəm. Bu söhbəti etmək ayıbdır. Sanitar qovşağını bu şəkildə (tualet kimi) təqdim edən adamlar görsəydi ki, o, necə bir qovşaqdır, məsələyə belə münasibət bildirməzdilər”...

Xatırladaq ki, sözügedən ayaqyolunun açılışında Beyləqan Rayon İcra Hakimiyyətinin başçısı Vaqif Abdullayevlə yanaşı Yaponiyanın Azərbaycandakı səfiri də iştirak edib.

Beyləqanda analoqu olmayan "mərasim” – tualetin açılışı

"Bizim Cəbiş müəllim” filmindən olan bu sitat bu gün Beyləqan şəhər 1 və 4 nömrəli tam orta məktəblərində baş verən açılış mərasiminə tam aid ola bilər.

Belə ki, ölməyib, tualetin açılışı mərasiminin də keçirilməsini gördük. Adını da mədəni qoyublar -yeni sanitar qovşağın açılışı.

Tədbirin "ən maraqlı” məqamı isə ondan ibarət olub ki, tualetin açılış mərasimində Azərbaycan himni səsləndirilib…

Öz tərəfimizdən qeyd edək ki, Azərbaycan tarxində bəlkə də ilk dəfədir ki, belə bir analoqu olmayan "hadisə” baş verib.

Özü də indiyədək tək bizdə deyil, dünyanın hələ heç bir yerində tualetin açılış mərasimi kimi hadisə yaşanmayıb, yaşanıbsa da, görünür, biz bu "tarixi anı” qaçırmışıq…