“Bizi dəhşətli günlər gözləyir”

“Hazırda Ermənistanda ölkənin sosial-iqtisadi vəziyyətindən razı qalan bircə adam belə yoxdur”.

Vətəninfo.az  Axar.az-a istinadən xəbər verir ki, bu sözləri erməni deputatı Mikael Melkumyan hökumətin 2013-cü ilin  büdcəsi ilə bağlı verdiyi hesabata münasibət bildirərkən söyləyib. Millət vəkili anlaşılmaz vəziyyətin yarandığını qeyd edib. O, büdcədə artımın olmadığını, lakin büdcə xərclərinin çoxaldığını nəzərə çatdırıb:

“6,2 faiz artım nəzərdə tutulsa da, ötən il bu rəqəm 3,5 faizi aşmadı. Belə olan surətdə büdcəni 122,6 milyard (təxminən 2,8 milyard dollar) qaldırmaq hansı məntiqə sığır”.

Ölkədə sahibkarlar risklərinin artdığını və 1500 kiçik və orta sahibkarlıq müəssisəsinin bağlandığını deyən deputatın fikrincə, Ermənistanda satışın ümumi həcmi kəskin şəkildə düşüb, əhalinin alıcılıq qabiliyyəti azalıb və işləmək ümumiyyətlə sərfəli olmur: “Sahibkarlar çıxış yolu kimi zavodları bağlayırlar. Yaxın gələcəkdə vəziyyət daha da acınacaqlı olacaq. Çünki elektrik enerjisinin tarifləri də qalxır və dəhşətli günlər başlayacaq”.

Xatırladaq ki, avqustun 1-dən etibarən Ermənistanda elektrik enerjisinin qiymətinin qaldırılması nəzərdə tutulur. Ermənistan Elektrik Şəbəkəsinin borcu 16 milyard drama (3,04 milyon manat) yüksəldiyi üçün qiymətlərin qalxması qaçılmaz fakta çevrilib. Müqayisə üçün deyək ki, Ermənistanda Atom Elektrik Stansiyası fəaliyyət göstərdiyi üçün elektrik enerjisinin istehsalı çox ucuz başa gəlir.

Vətəninfo.az