Məsələn, ən böyük şəhərlərimizdən biri olan Sumqayıtda marşrut dayanacaqlarının hazırkı durumu çox bərbaddır. Həmin dayanacaqların hamısı sanki böyük bir zibil qutusunu, reklam lövhəsini xatırladır. Dayanacaqların içi-çölü zibilxanaya çevrilib, divarları isə yapışdırılan kağız-kuğuzla "bəzədilib”. Burada masajçı, kisəçi reklamından tutmuş, iş axtaran, ev satan elanına qədər hər növ məlumat var. Bu geniş "funksiyalı” dayanacaqlar, göründüyü kimi, şəhər sakinlərinə həm də "elan, reklam” "xidməti”  göstərir. Bu "rəngarəng” dayanacaqlar demək olar ki, şəhərin bütün küçə və prospektlərini "bəzəyir”. Təbii ki, dayanacaqları zibil qutusuna, reklam lövhəsinə çevirən insanlarımızın günahı çoxdur. Ancaq cavabdeh kəslər bu biabırçı duruma biganə qalmamalıydılar. Uzunmüddətli müşahidələrimiz göstərir ki, dayanacaqlara heç vaxt nəzarət edilmir, bu acınacaqlı vəziyyəti nəzərə alan yoxdur. Ancaq hər halda inanırıq ki, başı "vacib məsələlərə” qarışan aidiyyatı təşkilatlar qəflət yuxusundan ayılacaq. İnanırıq ki, nəhayət həmin dayanacaqlarda təkcə elan və reklam oxumaqla kifayətlənməyəcək, təmizlik işləri ilə də məşğuı olacaqlar.

Onu da qeyd edək ki, marşrut dayanacaqları Dövlət Avtomobil Nəqliyyatı Xidmətinin Sumqayıt Regional şöbəsinin tabeçiliyindədir. Bu gün regional şöbədə olan əməkdaşımız, dayanacaqlara səhlənkar yanaşan bu idarənin mühafizəsinin çox güclü təşkil edildiyinin şahidi olub. Sərəncamında mühafizə polisi saxlayan şöbə rəisi Anar Səfərlinin kimdən və nədən qorunduğu isə bizim üçün müəmmalıdır.