Əli Abbasov evindən oğurlanan 1 milyon dollardan danışdı

Bir sıra internet informasiya resurslarında sabiq rabitə və yüksək texnologiyalar naziri Əli Abbasovun Goradildəki bağ evindən oğurluq edildiyi barədə informasiyalar yayılıb.

Nazirin evindən nə az, nə çox, 1 milyon manat pul oğurlanıb. Oğrular həyətdəki öyrədilmiş itin də zərərsizləşdirilməsi üçün plan cızıb. Yəni bir müddət hasardan itə yem verərək özlərinə öyrəşdiriblər. Bundan sonra həyətə girib niyyətlərini gerçəkləşdiriblər.

Yayılan məlumatlarda hadisə ilə bağlı araşdırmanın Milli Təhlükəsizlik Nazirliyi (MTN) tərəfindən aparıldığı və oğruların saxlanıldığı bildirilib. Həmin vaxt Əli Abbasov oğrulara pulun bir qismini qaytarmaq şərtilə azadlığa buraxılmalarına şərait yaradacağını təklif edib. Amma oğrular bu təklifdən imtina ediblər və hazırda da cəzaçəkmə müəssisələrindədirlər.

Nazir onun barəsində yazılan məlumatlara belə münasibət bildirdi.

"Mən də xəbərləri oxumuşam.Yazıblar ki, guya oğurluq edən şəxslər artıq həbs olunublar. Axı, həbs birdən olmur. Bunun üçün məhkəmə olmalıdır. Bu hadisə nə vaxt baş verdi ki, məhkəmə də oldu. Həbs olunanlar kimdir? Adları belə yoxdur. Həm də yazırlar ki, bu işə MTN baxır. MTN-lə oğurluğun nə əlaqəsi? Guya bağımdakı iti də zərərsizləşdiriblər. Yazılanlar həqiqətə uyğun deyil", - deyə sabiq nazir qeyd etdi.

Əli Abbasov onu da əlavə etdi ki, onun, həqiqətən də 1998-ci ildən Goradildə bağ evi var. Amma oradan heç nə oğurlanmayıb. 

Müstəqil Azərbaycanın ilk Rabitə və yüksək texnologiyalar naziri olan Əli Məmməd oğlu Abbasov 1 yanvar 1953-cü ildə Azərbaycan Respublikasının Naxçıvan şəhərində anadan olub. 1976-cı ildə Moskva Energetika İnstitutunu "Avtomatika və telemexanika” ixtisası üzrə bitirib. Bir il Azərbaycan Elmlər Akademiyasında işlədikdən sonra Ukrayna Elmlər Akademiyasında aspiranturada təhsilini davam etdirib. 

1994-cü ildə 05.13.14 - "İnformasiya emalı və idarəetmə sistemləri" ixtisası üzrə dissertasiya müdafiə edərək və texnika elmləri doktoru adını alıb. 1996-cı ildən professor, 2001-ci ildən isə Azərbaycan Milli Elmlər Akademiyasının həqiqi üzvüdür. 2000-2004-cü illərdə Azərbaycan Dövlət İqtisad Universitetinin rektoru olub. Azərbaycan Respublikası Prezidentinin 7 mart 2014-cü il Sərəncamı ilə Rabitə və Yüksək Texnologiyalar naziri təyin edilib. Ötən il noyabrın 12-də isə prezident İlham Əliyevin müvafiq sərəncamı ilə vəzifəsindən azad edilib.

 

*****

 

 

 

11:34 

 

Bir neçə gün əvvəl unikal.org saytı sabiq Rabitə və yüksək texnologiyalar naziri Əli Abbasovun bağ evindən 1 milyon dolların oğurlanması ilə bağlı xəbər yaymışdı. Həmin məlumatda Əli Abbasovun Goradildəki bağ evindən külli miqdarda pul oğulandığı qeyd olunmuşdu:

"Belə ki, oğrular həyətdəki öyrədilmiş itin də zərərsizləşdirilməsi üçün plan cızıblar. Yəni, oğrular bir müddət hasardan itə yem verərək özlərinə öyrəşdiriblər. Bundan sonra həyətə girib niyyətlərini gerçəkləşdiriblər. 

Maraqlı məqamlardan biri də odur ki, hadisə ilə bağlı araşdırma MTN tərəfindən aparılıb və oğrular saxlanılıb. Həmin vaxt Əli Abbasov oğrulara pulun bir qismini qaytarmaq şərtiylə azadlığa buraxılmalarına şərait yaradacağını təklif etsə də oğrular bu təklifdən imtina ediblər. Onlar hazırda da cəzaçəkmə müəssisələrində cəzalarını çəkir”.

Miq.az haqqın.az saytına istınadən bildirir ki, hadisə nazirin vəzifəsindən azad edilməsindən bir neçə həftə sonra baş verib. Operativ-istintaq tədbirləri nəticəsində qarətçilər müəyyən edilərək saxlanılıb.