Gürcüstan qaz hasilatına başladı

Həmin ərazi azərbaycanlıların yaşadığı Qaraçöp mahalına məxsus olub

Gürcüstanda azərbaycanlıların kompakt yaşadığı Qaraçöpün (Saqareco rayonu) Yor-Muğanlı kəndinin “Acı Dərə” deyilən ərazisində Amerikanın “PRONTERA” şirkəti tərəfindən tapılmış qaz yatağından "mavi yanacağ"ın hasilatına başlanılıb. Vətəninfo.az APA-ya istinadən xəbər verir ki, tədbirdə ABŞ-ın Gürcüstandakı səfiri Riçard Norland da iştirak edib.

Şirkətin icraçı  direktoru Stiv Nikadros jurnalistlərə açıqlamasında onun rəhbərlik etdiyi “PRONTERA” şirkətinin 1997-ci ildən Gürcüstanda fəaliyyət göstərdiyini və təbii qaz tapılan yerdə 2011-ci ildən kəşfiyyat işlərinin aparıldığını bildirib: “Bu gün tarixi hadisədir. Biz indiyədək Gürcüstana 400 milyon dollar investisiya yatırmışıq. Bu investisiyanın nəticəsi olaraq, biz bu gün  42 milyard kubmetr qaz ehtiyatı olan yatağın ilk məhsulunu boruya ötürdük. İnanıram ki, bu tapıntı gələcəkdə Gürcüstanın qaz hasilatı sahəsində müstəqil olmasına böyük imkanlar yaradacaq”.

ABŞ-ın Gürcüstandakı səfiri Riçard Norland çıxışında Gürcüstanın gələcəkdə qaz ixrac edən ölkəyə çevriləcəyini qeyd edib.

Vətəninfo.az xəbər verir ki, həmin torpaqlar Qaraçöp sakinlərinin otlaq və əkin sahələri olub. Saakaşvili hakimiyyəti dövründə əhalidən xəbərsiz ərazi xarici şirkətə satılıb.

Vətəninfo.az