ABŞ-la İran arasında münasibətlər son açıqlamalardan sonra yenidən gərginləşməyə başlayıb. Miq.Az xəbər verir ki, sanksiyalar tətbiq ediləcəyi açıqlandıqdan sonra amerikalı müdafiə naziri Ceyms Mattisin İranı terrorçuların ən böyük sponsoru adlandırması rəsmi Tehranı qəzəbləndirib. 

İran bu gün keçiriləcək İnqilab keşikçiləri təlimlərində yeni raket sınağını reallaşdırılacağını açıqlayıb.

 

İstiPress-in "Hürriyət"ə istinadla verdiyi məlumata görə, təlimlərdə İran istehsalı olan radar, raket və kiber savaş sistemləri ilə yanaşı komandan, nəzarət məntəqələrinin də istifadə ediləcəyini açıqlanıb. 

Qeyd edək ki, iki ölkə arasında gərginlik ötən həftə İranın ballistik raket sınağından sonra daha da gərginləşmişdi. ABŞ prezidenti Donald Tramp, rəsmi "Tvitter” hesabından paylaşdığı bir mesajda, "İran odla oynayır" ifadəsini işlədib. O, İranın həftə sonu reallaşdırdığı ballistik raket sınağına cavab olaraq belə bəyanat səsləndirib. Tramp, atdığı tvitdə bildirib ki, o, İrana qarşı, sələfi Barak Obama qədər "nəzakətli” olmayacaq.

Bu kəskin bəyanata cavab olaraq isə İranda ABŞ-ın şirkət və iş adamlarına sanksiyalar tətbiq ediləcəyi açıqlanıb. Bu barədə Xarici İşlər Nazirliyinin saytında yerləşdirilən məlumatda qeyd olunur.