Jurnalist qəzada öldü

Vətəninfo.az  xəbər verir ki, ötən gecə Bakı-Şamaxı yolunda baş verən ağır avtomobil qəzasında dünyasını dəyişən 4 nəfərdən biri jurnalist olub. Bu barədə “Türküstan” qəzetinin baş redaktoru Aqil Camal ANS PRESS-ə məlumat verib. Onun sözlərinə görə, “Türküstan” qəzetinin saytında redaktor vəzifəsində çalışan Fuad Abdürrəhmanlı qəza zamanı avtomobildə olub.

“Fuad bu yaxınlarda Türkiyəyə gedəcəkdi. O, Türkiyədə doktorluq işi üzrə müdafiə etməliyidi. Ailəsilə birlikdə Ankaraya yola düşməli idi. Özü həmişə siyasi-ictimai hadisələrin fəal iştirakçı olub. Həftə sonu olduğu üçün yaxınları ilə birlikdə Şəkiyə getmişdi”.

Qeyd edək ki, ötən gecə saat 00:10 radələrində Bakı-Şamaxı yolunda 4 nəfərin ölümü ilə nəticələnən ağır avtomobil qəzası baş verib. Şəki sakini, 1966-cı il təvəllüdlü İsmayılov Əlövsət Tahir oğlunun idarə etdiyi 99-DV-061 dövlət nömrə nişanlı “Mersedes” markalı minik maşını qarşı tərəfdən gələn 99-CS-488 dövlət nömrə nişanlı “KamAZ” markalı yük maşını ilə toqquşub.

Qəza zamanı 1966-cı il təvəllüdlü Əlövsət Tahir oğlu İsmayılov, onun sərnişinləri - 1981-ci il təvəllüdlü Elçin Rasim oğlu Məmmədov, 1973-cü il təvəllüdlü Elşad Hikmət oğlu Hüseynov və 1986-cı il təvəllüdlü Fuad Şahid oğlu Abdürrəhmanlı qəzada aldıqları ağır xəsarətlərdən dünyalarını dəyişiblər. Faktla bağlı araşdırma aparılır.

Vətəninfo.az