Hər qarışı şəhid məzarı, hər ovuc torpağı şəhidlərin qanı ilə yoğrulan bu müqəddəs torpaq dəfələrlə parçalanaraq bugünkü Azərbaycan halına düşmüşdür.

 

Azərbaycanın digər rayonları kimi Lerik rayonu da Qarabağ savaşında iki yüzə yaxın şəhid və itkin verərək tarixin ağrılı səhifələrinə adını yazmışdır. Azərbaycanın əzəli torpağı olan Dağlıq Qarabağa göz dikən erməni qəsbkarlarına qarşı mübarizə aparan və bu yolda canlarından keçərək şəhidlik zirvəsinə ucalan vətən oğulları haqqında çoxlu əsərlər yazılmış, filmlər çəkilmişdir. Eyni zamanda, Lerik şəhidləri haqqında da bir sıra kitablar, poemalar, şeirlər, publisistik əsərlər yazilaraq onların adları əbədiləşdirilmişdir. Belə ki, ölkənin tanınmış qələm adamları - Şəkər Aslan, İdris Şükürlü, Hüsaməddin Abbasov, Novruz Nəcəfoğlu, Dəstəgül Zamanlı, Qədiməli Əhməd və digərləri zaman-zaman bu mövzularda bədii və publisistik əsərlərlə çıxış etmişlər.

Bu mövzuda Əməkdar jurnalist, şair-publisist İdris Şükürlünün qələmə aldığı "Ölsən, inanma” kitabını və yazıçı publisist Hüsaməddin Abbasovun publisistik məqalələrini xüsusi qeyd etmək olar.

Onu da qeyd edək ki, bu mövzudakı əsərlər təkcə ağrı-acılı tarix deyil, həm də gələcək nəsillərə mesajdır. Bu mövzuda əsərlər yazan həmkarlarımıza da təşəkkür edirik.