“Real” almanları darmadağın edib finala çıxdı-VİDEO

Vətəninfo.az  xəbər verir ki, İspaniyanın kral klubu “Real” Madrid dünən Çempionlar Liqası yarımfinal mərhələsində “Bavariya”nı 4-0 hesabı ilə darmadağın edərək finala adlayıb.
"Real" 12 illik həsrətinə son qoyub. Klub sonuncu dəfə Çempionlar Liqasında 2001-2002-ci il mövsümündə final oynayıb və Çempionlar Liqası kubokunu başı üzərinə qaldırıb. Kral kubokunun finaldakı rəqibi bu gün keçiriləcək “Çelsi”- “Atletiko”Madrid görüşündən sonra bəlli olacaq.
2002-ci ildə mayın 15-də Qlazqonun “Hempdon Park” stadionunda alman təmsilçi “Bayer Leverkuzen”i finalda 2-1 hesabı ilə məğlub edən “Real” tarixi ərzində 9-cu dəfə bu mötəbər turnirin kubokuna sahib olub. Zinəddin Zidanın  “ensklopedik” qolu madridlilərə böyük sevinc bəxş etmişdi. Həmin zəfərin üzərindən 12 il ötür və eyni uğuru təkrarlamaq üçün “Real”ın qarşısında cəmi bir matç qalır.
Dünənki görüş isə  futbol tarixinə  Ronaldonun adını qızıl hərflərlə yazdı. Onun “Bavariya”ya qarşı dublu, ümumilikdə isə bu mövsüm vurduğu 16 qol yeni bir rekordun əsasını qoydu.

Vətəninfo.az