Rusiyanın hərbi dəniz gəmiləri Bakıya yaxınlaşır

Rusiya Hərbi Dəniz Qüvvələrinin Xəzər Flotiliyasının iki hərbi gəmisi Xəzəryanı ölkələrin limanlarına səfərə çıxıb.

Vətəninfo APA-ya istinadən xəbər verir ki, Flotiliyanın «Dağıstan» gözətçi gəmisi və «Qrad Sviyajsk» kiçik raket gəmisi bu gün səfər proqramına uyğun olaraq Mahaçqala limanından dənizə çıxıb.

İyirmi günlük səfər dostluq əlaqələrini gücləndirmək və tanışlıq məqsədi daşıyır. Rus gəmiləri Azərbaycan, İran və Qazaxıstan limanlarını ziyarət edəcək və Qazaxıstan Hərbi Dəniz Qüvvələri ilə birgə təlim keçirəcəklər.

Qeyd edək ki, Rusiya hərbi gəmiləri ötən il Bakıya, Azərbaycan HDQ-nin gəmiləri isə Həştərxana dostluq səfəri edib.