Seyran Ohanyanın etirafı

Ermənistanın müdafiə naziri təmas xəttindəki son insidentlərlə bağlı parlamentdə deputatların sorğusuna cavab verib

Ermənistanın müdafiə naziri Seyran Ohanyan erməni ordusunun cəbhədə diversiya hücumları həyata keçirdiyini təsdiqlədi. Vətəninfo.az-ın Virtualaz.org-a istinadən verdiyi məlumata görə, Seyran Ohanyan təmas xəttindəki son insidentlərlə bağlı parlamentdə deputatların sorğusuna cavab verib.

Seyran Ohanyanın sözlərinə görə, erməni cəmiyyəti bu vəziyyəti başa düşməli və onunla barışmalıdır ki, nə qədər münaqişə nizamlanmayıb, erməni ordusu düşmənin “sıçrayışlarına” əks-tədbirlər və preventiv addımlarla cavab verməlidir. “Münaqişənin həlli üçün biz etimad mühiti yaratmalıyıq, bunun üçün isə snayper atəşlərindən çəkinmək, atəşkəs rejiminə əməl etmək, təxribatçı hücumlardan çəkinmək və s. lazımdır”, - deyə Ermənistan müdafiə naziri bildirib.

Ohanyanın sözlərinə görə, erməni tərəfi təmas xəttinin bütün istiqamətlərində mühəndis qurğuları, müşahidə və atəş vasitələri ilə qarşı tərəfin hərəkətlərinin qarşısını alır. “Əmin etmək istəyirəm ki, bəzi hallarda bizim addımlarımız nəinki sərt, həm də qabaqlayıcı olur”, - deyə düşmən ölkənin müdafiə naziri təmas xəttində diversiya əməliyyatlarına cəhd etdiklərini təsdiqləyərək bildirib. 

Xatırladaq ki, son bir neçə gün ərzində erməni qüvvələri azı 3 hərbçisini itirib. Ermənistan cəmiyyətində bu itkilərlə bağlı gərginlik yaşanır.

Vətəninfo.az