Bakı şəhər Baş Polis İdarəsində geniş əməliyyat müşavirəsi keçirilib

Bu gün Bakı şəhər Baş Polis İdarəsində geniş əməliyyat müşavirəsi keçirilib. “Vətəninfo.az”ın APA-ya istinadən verdiyi xəbərə görə, müşavirə 2012-ci il I rübün yekunlarına həsr olunub.

Paytaxt üzrə bütün idarə və bölmə rəislərinin iştirakı ilə keçirilən müşavirədə bu ilin ötən 3 ayı ərzində Bakı şəhərində qeydə alınan cinayət hadisələri, cinayətkarlıqla mübarizə sahəsində görülmüş işlərin vəziyyəti müzakirə olunub. Müşavirədə çıxış edən BŞBPİ rəisi, polis general-mayoru Rafiq Abbasov ölkədə ictimai-siyasi sabitliyin təmin olunması və qanunçuluğun qorunması istiqamətində Daxili İşlər Nazirliyinin üzərinə qoyulmuş vəzifələrin yerinə yetirilməsində Bakının polis orqanlarının fəal iştirak etdiyini qeyd edib.

Daha sonra hesabat məruzəsi dinlənilib. Müşavirədə həmçinin bu ilin may ayında paytaxtda keçirilməsi nəzərdə tutulan “Eurovision-2012” mahnı müsabiqəsi ilə əlaqədar həyata keçiriləcək təhlükəsizlik tədbirləri ilə bağlı da müzakirələr aparılıb. Bununla bağlı Rafiq Abbasov bir sıra tapşırıq və tövsiyələr verib.