Blatter FİFA prezidentliyindən kənarlaşdırıldı

FİFA-nın Etika Komitəsi Yozef Blatteri bu təşkilatın prezidentliyindən 90 günlüyə kənarlaşdırıb.

"Sky News" bu barədə Y.Blatterin müşaviri Klaus Ştelkerə istinadən məlumat yayıb.

Xəbərə görə, Etika Komitəsi sentyabrın 26-da Y.Blatter və UEFA prezidenti Mişel Platini barədə araşdırmalara başlayıb. Bundan bir gün əvvəl isə İsveçrənin Federal Ədliyyə Bürosu Y.Blatter barədə cinayət işi açıb. FİFA prezidenti vəzifə səhlənkarlığında və mənimsəmədə ittiham olunur.

Y.Blatter həmçinin M.Platiniyə 2 milyon İsveçrə frankı məbləğində rüşvət verməkdə suçlanır.

FİFA prezidentinə qarşı irəli sürülən ittihamlardan biri də onun Karib hövzəsi ölkələri Futbol İttifaqı ilə FİFA üçün əlverişsiz müqavilə imzalanması ilə bağlıdır.

Onu da qeyd edək ki, bu cinayət işi ilə əlaqədar FİFA-nın mənzil-qərargahında və Y.Blatterin iş otağında axtarışlar aparılıb.

Virtualaz.org