Cənub bölgəsi soyuqdan donur

Cənub zonasında, xüsusən Lənkəran və Biləsuvarda təbii qazın verilişi iki gündür dayandırılıb.

Sakinlərin VİZUAL.az-a verdiyi məlumata görə, təhsil müəssisələrində, xəstəxanalarda ciddi problemlər yaranıb. Qazın verilişinin dayandırılması ilə bağlı öncədən heç bir məlumat verilməyib.

Cənub bölgəsində havanın tempraturu aşağı düşdüyündən rayonda ciddi çətinliklər yaranıb. Yağıntı olduğundan qaz nəqlinin kəsilməsi heç də rayon sakinlərinin ürəyincə olmayıb.

Rayonətrafı kəndlərdə isə vəziyyət daha da acınacaqlıdır.

Əldə etdiyimiz məlumata görə, sakinlər bir neçə dəfə rayon qaz idarəsinə müraciət edib. Qaz verilişinin bərpası ilə bağlı idarə heç bir məlumat verməyib.

Qeyd edək ki, SOCAR cənub bölgəsinə qaz verilişində fasilə olması barədə məlumatlara aydınlıq gətirib.

Qurumun məlumatına görə, Qaz İxrac İdarəsi tərəfindən Lənkəran qazpaylama stansiyalarında, həmçinin bəzi ölçü qovşaqlarında təmir işləri aparılır. Təmir başa çatdıqdan sonra qazın verilişi bərpa olunacaq.

Təmirin nə vaxt başa çatacağı barədə məlumat verilməyib.