Qlobal.az eyni zamanda "Azəryaşlandşaft” ASC-nin də rəsmi saytına (http://www.ayl.eco.gov.az/index_4_id159_az.html) görülən işlər barədə məlumat əldə etmək məqsədilə baxış keçirib.

"Azəryaşlandşaft” ASC-nin saytında da sözügedən tender müqaviləsi üzrə görülən işlər barədə heç bir məlumat qeyd edilməyib.

Tender qanunvericiliyində şirkətlərə qarşı ixtisas tələblərini şərtləndirən müddəa var. Şirkətin bu işi görmək üçün texniki və texnoloji imkanları və kadr potensialı olmalıdır. Bütün bunlarla yanaşı "Azərbaycan yaşıllaşdırma və landşaft quruluşu” ASC-nin keçirdiyi tenderlərdə iştirak edən şirkətlərin adları və təklifləri açıqlanmır.

"Kənan İnşaat və Ticarət” MMC-nin profil üzrə hansı işləri görməsi, kadr və texniki imkanları barədə də heç bir məlumata rast gəlinmir.

"Azərbaycan yaşıllaşdırma və landşaft quruluşu” ASC ilə "Kənan İnşaat və Ticarət” MMC arasında bağlanmış 6,6 milyon (6584179) manatlıq tender müqaviləsində "çirklənmiş ərazisinin ekoloji vəziyyətinin sağlamlaşdırılması və landşaftın bərpası işləri”nin konkret müddəaları nədən ibarət olması, tenderdə başqa hansı şirkətlərin iştirak etməsi və görüləçək işlərin həcmi barədə Ekologiya və Təbii Sərvətlər nazirliyinə müraciət etdik.

"Azərbaycan Yaşıllaşdırma və Landşaft Quruluşu” ASC-nin Qlobal.az-ın elektron poçtuna ünvanladığı məktubda  Heydər Əliyev adına Beynəlxalq Hava Limanına yaxınlığındakı 272 hektar neftlə çirklənmiş ərazinin, qrunt və çirkab sularından əmələ gəlmiş gölün təmizlənməsi məqsədilə Azərbaycan Respublikası Prezidentinin Sərəncamı ilə "Çuxurdərə gölməçələrinin ekoloji vəziyyətinin sağlamlaşdırılması və landşaftın bərpası” layihəsinin işlənməsi üçün vəsait ayrıldığı deyilir.

"Ekologiya və Təbii Sərvətlər,  Maliyyə, İqtisadiyyat və Sənaye nazirliklərinin, eləcə də "Azərbaycan Yaşıllaşdırma və Landşaft Quruluşu” ASC-nin nümayəndələrinin iştirakı ilə tender komissiyası yaradılmış və tender prosedurları həyata keçirilmişdir. 21 sentyabr 2018-ci il tarixində keçirilən tenderdə 9 şirkət iştirak etmiş və ”Kənan İnşaat və Ticarət” MMC tenderin qalibi olmuşdur. 04 oktyabr 2018-ci il tarixində "Kənan İnşaat və Ticarət” MMC ilə "Azərbaycan Yaşıllaşdırma və Landşaft Quruluşu” ASC arasında müqavilə bağlanmışdır”-deyə, məktubda qeyd olunur.

"Azərbaycan Yaşıllaşdırma və Landşaft Quruluşu” ASC məktubunda daha sonra görüləcək işlər barədə də məlumat verir: "Kənan İnşaat və Ticarət” MMC tərəfindən ərazidə neft şlamı,  əhəng daşı, qrunt  daşınması, (D 250 mm), (D 500 mm), (D 600 mm), (D 800 mm) polietilen boru kəmərlərinin, (D 1 m),  (D 1,5 m),  (D 2 m) yığma d/b drenaj quyularının quraşdırılması işləri həyata keçirilir. İşlərin 2019-cu ilin fevral ayının sonuna yekunlaşması planlaşdırılır”./Qlobal.Az/