“Əlillər sanatoriyaya göndəriləcək”

 "Nazirlik tərəfindən hər il əlillərimiz xarici ölkələrə göndərilir. Bundan öncə əlilləri müalicə üçün Ukraynanın Saki şəhərinə göndərirdik”. Bu sözləri əmək və əhalinin sosial müdafiəsi nazirinin müavini Natiq Məmmədov bu gün yenilənmiş Abşeron və Xızı rayonları üzrə 13 nömrəli Tibbi-Sosial Ekspert Komissiyasının (TSEK) açılışı zamanı jurnalistlərə verdiyi açıqlamasında deyib.
Onun sözlərinə görə, hər il olduğu kimi bu il də əlillərimiz sanatoriya göndərilir. Əlillərin 3-cü qrupu Azərbaycana qayıdıb və yaxın zamanda 4-cü qrup xarici sanatoriyaya göndəriləcək: “Keçən il əlillərimiz Yunanıstana göndərildi. Bu il isə Türkiyə Respublikasının Dənizli sanatoriyasına artıq 70 nəfər dayaq aparat sistemi patologiyası ilə bağlı göndərilib və çox gözəl şəraitlə tanış olublar, əlillərimiz bundan çox razı qalıblar. Onlar artıq Azərbaycana qayıdıblar. Bu günlərdə biz 4-cü qrupu həmin sanatoriyaya, yəni Dənizli sanatoriyasına göndərəcəyik”.